ⴰⵏⴰⵥⵓⵕ ⵃⵎⴰⴷ ⴱⵉⵣⵎⴰⵡⵏ (1948 – 2021 ) ⵉⴳⴰ ⵢⴰⵏ ⵕⵕⴰⵢⵚ ⵍⵍⵉ ⴱⴰⵀⵔⴰ ⵉⵜⵜⵓⵙⵙⴰⵏⵏ ⴳ ⵢⵉⴳⵔ ⵏ ⵓⵎⴰⵔⴳ ⴰⵎⴰⵣⵉⵖ ⵙ ⵓⵎⴰⵜⴰ.
ⵜⵓⴷⵔⵜ ⵏⵏⵙ ⵉⵍⵓⵍ ⵓⵏⴰⵥⵓⵕ ⵃⵎⴰⴷ ⴱⵉⵣⵎⴰⵡⵏ ⴳ ⵜⵎⴰⵣⵉⵔⵜ ⵏ ⵜⵉⵎⵣⵖⵡⵉⵏ ⴰⵇⴱⵉⵍ ⵏ ⴰⵢⵜ ⴰⵎⵔ (ⵜⴰⴳⵔⴰⵡⵜ ⵏ ⵜⴰⵢⵔⵉ), ⴳ ⵓⵙⴳⴳⵯⴰⵙ 1948, ⵉⵖⵔⴰ ⵙ ⵉⵣⵡⴰⵔ ⴳ ⵜⵎⵣⴳⵉⴷⴰ ⵉⵍⵎⵎⴰ ⵉⵙⵎⴷ ⵜⵉⵖⵔⵉ ⵏⵏⵙ ⴳ ⵜⵉⵏⵎⵍ 1962, ⴹⴰⵕⵜ ⵍⵍⵉⵖ ⵉⵎⵎⵓⵜ ⴱⴰⴱⴰⵙ ⵉⴼⴼⵖ ⵜⵉⵏⵎⵍ ⴰⴼⴰⴷ ⴰⴷ ⵢⴰⵙⵉ ⵜⴰⵡⵊⴰ ⵏⵏⵙ, ⵉⵍⵎⴷ ⴳ ⵓⴼⵓⵙ ⵏ ⵄⵎⵎⵉⵙ ⵜⴰⵢⵔⵣⴰ ⴷ ⵉⴽⴽ ⵓⵍⴰ ⵜⴰⵡⵓⵔⵉ ⵏ ⵢⵉⵍⵍ (ⴰⴱⵃⵔⵉ), ⵜⵉⵣⵉ ⵏ ⵎⴰⴷ ⵉⴽⴽⴰ ⵜⵉⴳⵓⵔⵉⵡⵉⵏ ⴰⴷ ⴰⴽⴽⵯ ⴽⵓⵍⵍⵓ ⴰⵔ ⴰⵙⴳⴳⵯⴰⵙ ⵏ 1968 ⵍⵍⵉⵖ ⵉⵎⴰⴳⴳⴰⵔ ⴷ ⵓⵏⴰⵥⵓⵕ ⴷⴷⵎⵙⵉⵔⵉ ⵜⵉⵣⵉ ⵏ ⵎⴰⴷ ⴷⵉⵙ ⵉⵙⵎⵎⴰⴳⴳⴰⵔ ⵓⵏⵙⵙⵉⵅⴼ ⵏ ⵜⴳⵔⴰⵡⵜ ⵏ ⴰⵢⵜ ⴰⵎⵔ ⵍⵃⴰⵊⵊ ⵍⵃⵙⵏ ⴰⴱⵔⵏⵉ, ⴳ ⵓⵙⴳⴳⵯⴰⵙ ⵏ 1969.
ⵉⵎⵎⴻⵎ ⵓⵏⴰⵥⵓⵕ ⵃⵎⴰⴷ ⴱⵉⵣⵎⴰⵡⵏ ⵜⴳⴷⵉⵎⵜ ⵏⵏⵙ ⴷⴰⵔⵙ ⵉⵣⵡⵓⵔⵏ ⴳ ⵓⵙⴳⴳⵯⴰⵙ 1969, ⵜⵙⵙⵓⵙⵎ ⴱⴰⵀⵔⴰ ⴰⴳⴷⵓⴷ ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵜⴳⴰ ⵜⵉⴽⴽⵍⵉⵜ ⵜⴰⵎⵣⵡⴰⵔⵓⵜ ⴰⴷ ⵉⵙⵙⴽⵛⵎ ⴽⵔⴰ ⵓⵏⴰⵥⵓⵕ ⵢⴰⵏ ⵡⴰⵏⴰⵡ ⴳ ⵉⵎⴰⵙⵙⵏ ⵉⵎⴰⵢⵏⵓⵜⵏ ⵣⵓⵏ ⴷ ⵟⴰⵎⵟⴰⵎ, ⵜⵉⵖⴰⵡⵙⵉⵡⵉⵏ ⴰⴷ ⴰⴽⴽⵯ ⵓⵊⵊⴰⵏ ⵜ ⵕⵕⴰⵢⵙ ⵃⵎⴰⴷ ⴱⵉⵣⵎⴰⵡⵏ ⴰⴼⴰⴷ ⴰⴷ ⵉⵙⴽⵔ ⴰⴷⵖⴰⵔ ⵏⵏⵙ ⴷ ⵓⴳⴷⵓⴷ ⴳ ⵢⴰⵜ ⵜⵉⵣⵉ ⵉⴷⵔⵓⵙⵏ ⴳ ⵜⵥⵓⵕⵉ ⵏ ⵕⵕⵡⴰⵢⵙ ⵜⵉⵣⵉ ⴰⵏⵏ, ⴰⵅⴰⵜⴰⵔ ⵃⵎⴰⴷ ⴱⵉⵣⵎⴰⵡⵏ ⵓⵔ ⵉⴼⵍ ⵎⴰⴼ ⵓⵔ ⵉⵙⴰⵡⵍ (ⵜⴰⵢⵔⵉ, ⵜⵉⵎⵉⵣⴰⵔ, ⵉⵎⵓⴽⵔⵉⵙⵏ…).
ⵜⴰⵎⵜⵜⴰⵏⵜ ⵏⵏⵙ ⵉⵎⵎⵓⵜ ⵓⵏⴰⵥⵓⵕ ⵃⵎⴰⴷ ⴱⵉⵣⵎⴰⵡⵏ ⴳ 17 ⴷⵓⵊⴰⵏⴱⵉⵔ 2021 ⴹⴰⵕⵜ ⵏ ⵎⴰⴷ ⵜ ⵜⵙⵎⵔⵔⵜ ⵜⵎⴰⴹⵓⵏⵜ ⵏ ⴽⵓⵕⵓⵏⴰ.
ⵜⵉⵙⵎⵖⵓⵔⵉⵏ :ⵜⴰⵙⵎⵖⵓⵔⵜ ⵏ ⵜⵣⵍⵉⵜ ⵜⴰⵎⵓⴼⴰⵢⵜ ⵜⴰⴱⵍⴷⵉⵜ ⵙⴳ ⴷⴰⵔ ⵓⵙⵉⵏⴰⴳⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ 2007 .
ⴽⵔⴰ ⴳ ⵜⵡⵓⵔⵉⵡⵉⵏ ⵏⵏⵙ :-ⵎⴰⵢⴷ ⵉⴳⴰ ⵖⴰⵢⴰⴷ /ⵎⴰ ⵉⴳⴰ ⵖⴰⵢⴰⴷ(ⵉ)-ⵉⵕⴱⴱⵉ ⴰ ⵍⵄⵉⵏ-ⴱⵓⵙⴰⵍⵎ-ⵉⵏⵖⴰ ⴰⵖ ⵍⵀⵎⵎ ⵏⵏⴽ ⴰ ⵢⴰⵏ ⵙⵓⵍ ⵓⵔ ⴰⵔ ⵥⵕⵕⴰⵖ-ⵎⴰⵏⴰⴳⵓ ⵔⴰⴷ ⵏⵎⵓⵏ-ⴰⵃⵃ ⵉⵏⵓ ⵏⴳⴰ ⴰⵖⵔⵉⴱⵉ-ⴰ ⵛⵛⵡⴰⴼⵕ ⵍⵍⵉ ⴷ ⵉⴽⴽⴰⵏ ⴰⵖⴰⵔⴰⵙ-ⵎⴰⵏⵉⴽ ⴰ ⵏⵏ ⵜⴳⵉⵜ ⵎⴰⵏⵉⴽ ⴰⴷ ⵙⵔⴽ ⵜⴳⴰ ⵍⵓⵇⵜ-ⴰⵃⵃ ⴰ ⵕⴱⴱⵉ ⵢⴰⵖ ⵉⵢⵉ ⴽⵔⴰ ⴳ ⵍⵇⵇⵍⴱ (ⵉ )-ⴰ ⴰⵟⴱⵉⴱ ⵉⴳⴰⵏ ⴰⵟⵎⵎⴰⵄ-ⴰ ⴱⵉⵙⵎ ⵉⵍⵍⴰⵀ ⵉⴼⵓⵍⴽⵉ ⴳ ⵉⵎⵉ ⵣⵓⵏ ⴷ ⵍⵍⵓⵣ-ⵍⵃⵓⴱⴱⵉ-ⵉⵡⵉⵖ ⴷ ⵓⴽⴰⵏ ⴰⵎⴰⵔⴳ ⴰⴷ ⵜ ⵉⵏⵏ ⴷⴰⵡⴰⵖ(ⵉ)-ⵍⵓⵃ ⵜⴰⵖⵔⵉⵜ ⴰ ⵍⴱⴰⵣ ⵜⵕⵥⵎⵜ ⵉ ⵔⵔⵉⵛ(ⵉ)-ⴰⵏⴰ ⴱⵍⵍⴰⵀ ⵓ ⵛⵛⵕⴰⵄ-ⴰ ⵍⴰⵃ ⵍⵅⴱⴰⵕ ⵓⵍⴰ ⵜⴰⴱⵔⴰⵜ-ⵎⴰⵏⵣⴰ ⴽ ⴰ ⵢⴰⵏ ⵉⴼⵜⴰⵏ-ⵉⵀ ⴰ ⵍⴱⵃⵕ-ⴰⵃⴱⵉⴱ ⵉⵏⵓ ⴳⵉⵖ ⵏⵏ ⵙⵉⵡⵏ ⵍⵓⵍⵢⴰ ⵏ ⵕⴱⴱⵉ-ⴰ ⵡⵉⵏⵓ ⵍⵓⵃ ⴷ ⴰⴼⵓⵙ
ⵉⵙⵓⴳⴰⵎ ⵉⵎⵣⴷⴰⵖⵏ ⵏ ⴰⵢⵜ ⴰⵎⵔ (ⵜⵉⵎⵣⵖⵡⵉⵏ)ⴰⵖⴰⵡⴰⵙ ⵏ ⵜⴼⵔⴰⵙ ⵓⵍⴰ ⵃⵍⵓ
ⴰⵎⴰⵔⴰ: ⵃⵎⴰⴷ ⴰⵢⵜ ⵜⵜⵀⴰⵎⵉ
الكاتب: أحمد ايت التهامي
